Verrassings en bederf!

Dalk het jy nog nie een van my boeke gelees nie. Maak nie saak nie. Ek deel ‘n vreugde met jou.

Verrassings bly ’n lekker ding. 🎉🤩 🙏

Beklitsde Kersfees vanaand nr 1 op Amazon se Best Sellers!

Dis nie al nie! Filtervlinder is #11, Klonte Sout is #46 en Ontfrommel #48. Die slim menses sê om onder die eerste 100 te wees, is ’n voorreg.

Die is nie spog nie, want ek het niks gedoen nie. Die is pure DANKBAARHEID vir almal wat lees, en julle wat lees is ‘n skrywer se motivering om aan te hou, al raak ons wiele (vingers en gees) soms moeg en pap. DANKIE LESERS!

Dit help nie ons skryf en niemand lees nie… dis die slotsom.

Meer inligting oor al my boeke op www.elsabewelman.co.za

Of Amazon:  amzn.to/3RhuU6s

Of Goodreads: bit.ly/3XOmoOA

EN DIE BEDERF??

Ons dogter en haar man was vir 14 dae op ‘n vaart en Anthoon het hulle honde opgepas. Vier honde het elke aand op, onder of langs sy bed saam met hom oornag. Hulle dankie-sê was om ‘n groot deel van ‘n bootrit-kaartjie te borg. My enigste liefde borg myne. DUS… ek en Anthoon-kind klim Maandag op die Sinfonia en vaar Walvisbaai toe en terug. Ons tone kriewel van opgewondenheid. Mens eet mos heeldag op so ‘n vaart.

“Ma, ek gaan niks groente die week eet nie.”

“Dis reg, Anthoon. Eet net wat jy wil. Moet net nie siek word van te veel eet nie.”

Ek lees en skryf eers weer oor meer as ‘n week. More ry ons Kaap toe… die vakansie het begin.

Dans deur die foute

Het jy ook al gesukkel om jouself te vergewe oor dom besluite, dom keuses, dom handelinge?

Dit het al te veel keer met my gebeur.

Anthonie sê altyd mens loop met die lig wat jy op daardie stadium gehad het. Want feit is, ons sien nie vooruit nie.

Soms word ons besluitneming ook ingekleur deur omstandighede waarin ons ons bevind, dinge wat ons benoud maak. Ek moet gou doen, gou besluit… Ons wat siende-blind is want ons kyk net tot voor op ons tone. Al hierdie dinge maak dat ek nie bietjie wag sodat die Vader vir my wys watter kant toe nie. Ek kyk vas teen ‘n klip en nie op na die Vader se lig nie. En dan doen ek. En kort voor lank besef ek dit was nie so slim nie.

Gelukkig is die genade daar. En op ‘n manier vat ons Vader die dom besluit en toor dit om sodat ek op die regte plek uitkom. Niks is vir Hom te moeilik om te hanteer nie. Selfs ook nie my verkeerde besluite nie.

Wees jouself, en dans!

Ek kan nie eers onthou waar ek hierdie gekry of afgelaai het nie.

Ek deel dit met jou.

Ons wil mense in boksies plaas … boksies wat vir ons gemaklik en veilig is.

Ek ervaar dit ook met my skrywery, en dit laat my glimlag. Omdat my man in ‘n sekere beroep is, moet ek in ‘n boksie pas. Dis tradisie. Selfs as skrywer moet ek dit liefs nie buite die boksie waag nie.

Ek kan nie. Ek hoef nie. Ek wil nie. Ek wil die Elsabé weergawe leef. Jammer as dit iemand nie pas nie.

Nou ja… daar gaat ons! Uit die boks! Cheers.

Nou moet ek net oppas om nie ander mense in my leë boks te prop nie.

Wat sal die les wees: kom ons laat mekaar toe om te wees wat ons bedoel is om te wees.

Dans in die mark

‘n Paar dae gelede gesels ek en my dogter oor ons inkopiedae in Gurue (Mosambiek) se Mall. Ons diep toe ‘n paar foto’s op. Mooi herinnering. Vir ons was dit ‘n hele “outing”, want daar was niks anders om ons te vermaak nie.

Die foto’s is nie iets unieks nie. Almal wat al in Afrika gereis het, sal dit ken. Ek deel dit vanoggend sommer net met julle.

Om in die eenvoud van Mosambiek te kon leef, was goed vir ons. Goed vir ons siele. Mens sien weer klein dingetjies raak. Jy waardeer weer klein dingetjies.

Bondels klere uit Europa word hier verkoop. Soms lê dit in hope op die grond. Ek het nou nog die mooiste sigeuner-styl onderbaadjie wat ek daar gekoop het.
Slaghuis. Kyk die vlieë! Dis een plek waar ons gefaal het: ons het nooit die slaghuis ondersteun nie. Eerder privaat gekoop en hoender geslag.
Gedroogde vissies
Hardeware winkel met spykers, vurke, ens
Kleinmaat ghries vir die fietse

Glo die God waarin jy glo

Ek het hierdie ‘n tyd terug te hore gekom, en dit het vasgeval in my hart.

Ons sê maklik ons glo in God, maar wanneer dinge moeilik raak of is, glo ons Hom steeds?

Dit gaan soms rof en onbeskof met ons. Jy bid maar dinge gebeur nie soos jy vra nie. Mens is teleurgesteld. God het vergeet van my.

Jeremia 32:27: “Ek is die Here die God van al die mense. Is iets vir My onmoontlik?”

Hy ken my omstandighede. Wat ek dink die antwoord is, wat moet gebeur, sal dalk ‘n groter krisis veroorsaak. Ek is net mens. God sien die groter prentjie.

As Hy iets in Sy woord sê, bedoel Hy dit. Ons moet net oppas om nie stertjies by Sy beloftes by te las nie.

Nietemin, ek klou vas aan hierdie woorde.

Hy weet die beste, want Hy is GOD. Hy het ons belange op Sy hart.